Lantamentu di partido na aña 1993 tabata un gritu di un grupo grandi di siudadano preokupá. E gritu aki defakto tabata un gritu di ousilio pasó e problemanan ku tabata reina den nos pais tabata grandi. Problemanan manera pobresa kresiente, korupshon na órden di dia i hasta bisto públikamente, kriminalidat alarmante, un gran kantidat di dropout, norma i balornan dekaí, kuido médiko impagabel pa esnan di ménos rekurso i un sistema di enseñansa ku a wòrdu neglishá kompletamente tabata na órden di dia. Aparte di esakinan nos ekonomia a kuminsá drenta den un krísis, e relashon ku Hulanda tabata hopi tenso, nos aparato públiko tabata tres biaha mas grandi ku tabatin mester, e kaha di gobièrnu tabata sin fondo i e grado di korupshon a pasa tur límite di desensia. I pa kolmo nos florin tabata den zona di peliger pa devaluá.

Hopi problema...unda kuminsá ‘ruim op de boel’?         

Partido PAR komo partido nobo ku a bai su promé elekshon na 1994 ku resultado abrumador a kuminsá ku e reto di mas grandi den nos historia polítiko. Un reto pa solushoná tur e problemanan aki na un forma integral. Tur e problemanan por wòrdu konsiderá komo áreanan di kanser avansá den un kurpa humano.E pashènt Kòrsou ta sumamente malu i un operashon ta e úniko opshon. Un operashon kompliká i no sin riesgo.

Kada persona ku dos plaka di sintí por komprondé ku problemanan asina grandi no por wòrdu solushoná den 1 aña, ni den 2 aña ni hasta den 10 aña. Problemanan asina ta pidi pa esfuersonan grandi i kambionan fundamental den nos manera di pensa, rasoná, argumentá i forma di práktika polítika. E ta enserá luchanan fuerte i kontinuo ku partidonan polítiko i gruponan di poder dudoso ku den promé lugá ta responsabel pa e káos. E ta enserá perseveransha i kurashi, hopi kurashi polítiko pa apesar di tur atake tòg sigui bai dilanti.
 
Den e último 14 aña no tabata fásil pa solushoná e problemanan. Es mas, hopi di e problemanan no a wòrdu solushoná kompletamente i den aña 2007 nos por konkluí ku nos no a yega ainda. Esaki por ta zona straño, pero no sorprendente si bo realisá ku e raisnan di esnan ku a kousa e problemanan tin mas ku 35 aña bieu. No opstante tur esaki hopi a wòrdu lográ, masha hopi mes! PAR no ta kla ainda, falta hopi ainda. Pero mirá over di un periodo di 14 aña unda diferente tim di profeshonal hóben i ménos hóben i ku lidernan manera Miguel Pourier, Etienne Ys i Emily de Jong-Elhage, nos ta riba e bon kaminda unda e kambionan den struktura estatal den Reino Hulandes ta duna un bista real riba un mihó bienestar pa pueblo di Kòrsou.