Mi a nase na Kòrsou riba 28 di aprel 1969 komo yu di Stanley Walroud i Thelma van Velzen i ruman chikí di Zarine Walroud. Mi a lanta den e bario di Julianadorp.

Mi skol básiko m’a pasa na Goiloschool pa despues bai Havo na Peter Stuyvesant Collage.
 
Despues di finalisá mi Havo ku 17 aña mi a bai Hulanda unda mi a bai hasi VWO na Cals College na Nieuwegein (Utrecht). Ku mi diploma di VWO den man mi a bai studia na e suidat Groningen na Hanzehogeschool (HBO). Einan mi a hasi e estudio ‘Commerciele Economie’. Pa finalisá mi periodo di estudio mi a bai Spaña unda mi a studia 6 luna na Universidat Complutense di Madrid na e fakultat di politikologia.
 
Ku mi diplomanan bou mi di mi brasa mi a regresá mi isla natal na edat di 25 aña. Mi a kuminsá traha na ING Bank na aña 1994 komo Branch Liasion Officer. Durante mi karera na banko mi a optené diferente diplomanan bankero i mi a haña un bon bista riba e industria bankero.

Despues di dos aña mi a disidí di kuminsá mi mes negoshi. Mi a lanta dos kompania kua ta un marketing consultancy i un skol di baile di salsa. Tur dos kompania ta eksistí te dia djawe ku éksito i ta perkurá pa mi pan di kada dia banda otro inisiativanan ku ma tuma manera Curaçao Salsa Tour, Roadwatch i Proefkonijn.com; union di konsumidó na Kòrsou.
 
Djis promé ku e elekshon di konseho insular di 1999 mi a wòrdu puntra pa Miguel Pourier pa ta kandidato hóben riba lista di PAR. Ku orguyo mi a aseptá esaki. Na 2003 mi a sirbi mi isla komo miembro di konseho insular pa un periodo kòrtiku.

Aworakí mi tin 40 aña i mi tata di dos yu (Stephanie di 10 ku Timothy di 8 aña).

For di yüli 2007 mi ta miembro di konseho insular di teritorio insular di Kòrsou i trahando duru pa sirbi pueblo di Kòrsou mas mihó posibel!