Kiko ta motivá ami pa drenta den e arena polítiko?

Porta pasó semper mi a sinti mi mes enbolbí ku e destino di mi komunidat?
Porta pasó mi nos por wanta mas pa wak kon mi komunidat ta keda bai mas i mas patras?
Porta pasó mi no por mira nada ku ta hole korupshon?
Porta pasó mi ta mira muchu tiki hóben aktivo den polítika?

Tantu rason....
 
Ta e konvikshon ku nos komo komunidat por presta hopi mas mihó ku loke nos a presta te awor aki?
Ta paso mi ta puntra mis mes kada dia mas i mas ta kiko ta pasa ku mi sèn di belasting pasó mi no ta mir’é bèk den nos komunidat?
Ta pasó mi ke wak mi yunan krese den un komunidat ku ta duna garantianan real pa un futuro?

Mas rason!
 
E grado haltu di kriminalidat i molèster di gruponan ku ta metí den e negoshi di droga!
E silensio hermétiko ku ta reina riba e problema grandi e embeyesimentu (vergrijzing) di nos komunidat!
E falta di union  i sentido komun den tur e gruponan di interes riba nos isla!
E kosto haltu di bida ku kada dia ta sigui krese!
E salida kontinuo (brain drain) di nos hendenan mas sabí pa paisnan grandi manera Hulanda i Merka
E sistema baho di hiba polítika partidista!
E tendensha kresiente ku sierto polítikonan ta kere ku lei no ta konta pa nan!
E manera deskabeyá ku ta manehá nos institutonan di gobièrnu i/o kompanianan di gobièrnu i den hopi kaso sabiendo mihó!
E manera ku sierto polítikonan - sabiendo mihó - ta keda persistí den hasi kos skùin - duars!

Mi motivashon?

Tur e rasonnan akiriba menshoná ta forma huntu mi motivashon pa drenta den e arena polítiko.  Mi ta konvensí ku nos huntu por hasi un trabou muchu mas mihó, basta nos ke. A bira tempu pa un otro sorto di polítiko. A bira tempu pa karanan nobo, pa sanger fresku. A bira tempu pa kibra ku pensamentunan antikuá ku den e mundu globalisá aki no tin valides mas. A bira tempu pa nos pone un stap grandi den e direkshon di union i bienestar guiá dor di e teim di PAR ku Emily na kabes.